NewZealandStories/ 003 我的第一架車！
以前覺得係香港無需要開車，所以無諗過要學車。後來大個左發覺就算係香港唔開車，係外國自駕遊其實都係一種唔錯既旅行方式，加上去新西蘭工作假期都想自己開車周圍去，所以拿拿林去考個車牌。 車牌都算輕鬆到手，但本身對車既認識係：望住人地個 logo 都講唔出叫咩名。當然為左買一架可以同我上山下海而唔會無啦啦死火既車，要上網做功課，問下朋友，最後千挑萬選我人生中第一架車：2003 Toyota Vitz 。 可能係好多識車之人眼中佢不論牌子同型號都係平平無奇，不過我覺得佢似我：細細粒，上山要俾d耐性，耐用唔易壞！其實只要符合自己需要，表現中規中矩就心滿意足。 諗住過左買車呢個咁煩既step（可能對鐘意車既朋友黎講係享受，對無知既人黎講係麻煩），之後諗住會輕鬆d，但係事實上對新手黎講呢個先係開始。 除左操返手車，搵下感覺，都要學下點換胎打氣。另外因為係新西蘭好多人揸van／campervan，或者其他大大份既車，所以泊車位都闊，總算煩少樣。操車最緊張既係以前有師傅係隔離會幫眼，好彩當時有係takeaways打工既老闆幫手睇下，慢慢建立返信心揸車。 呢架車就陪左我一齊遊南北島，無論係大雨到睇唔到路，定係九曲十三彎上山落山路奔馳，又或者玩到入夜黑麻麻先開車，佢都將我安全送回家。 係新西蘭要擁有一架車先可以自由自在按著自己步伐同心意穿州過海，呢d滿足感係無法取代！